Nënpresidenti amerikan Joe Biden, arriti të martën në mbrëmje në Kosovë në kuadër të vizitës dyditëshe në rajon në përpjekje për të nxitur përparimin e Kosovës dhe Serbisë drejt integrimeve evropiane.
Ai u prit në aeroportin e Prishtinës nga presidenti i Kosovës, Hashim Thaçi. Nënpresidenti Biden sot do të realizojë takime me presidentin Hashim Thaçi dhe kryeministrin Isa Mustafa. Më tej takimi do të vijojë me një konferencë për mediat.
Udhëheqësit e institucioneve dhe partive politike në Kosovë e kanë cilësuar vizitën e Biden me rëndësi historike ndaj të gjitha rrugët në Kosovë kanë qenë të zbukuruara me flamujt amerikanë dhe ato kosovarë. Biden shihet si një nga mbështetësit më të fuqishëm të lirisë dhe pavarësisë së Kosovës.
“Ne do të bëjmë përpjekje që nënpresidentin Biden ta njoftojmë me ecuritë aktuale në Kosovë, të kërkojmë po ashtu që bashkërisht edhe më tutje t’i shtyjmë proceset që janë të rëndësishme jo vetëm për Kosovën por edhe rajonin por edhe miqësinë dhe partneritetin me Shtetet e Bashkuara të Amerikës. Ne, Shtetet e Bashkuara i shohim partnerin më të rëndësishëm strategjik për Republikën e Kosovës, është vendi i cili në të gjitha fazat e ka përkrahur dhe ndihmuar edhe shtetin e Kosovës dhe qytetarët e Kosovës”, tha kryeministri Mustafa.
Vizita e nënpresidentit Biden e gjen Kosovën në një periudhë tensionesh për shkak të mospajtimeve rreth marrëveshjes për shënimin e kufirit me Malin e Zi. Kjo çështje mund të zërë vend në takimet e tij në Prishtinë ku pritet që të diskutohet edhe përballja me ekstremizmin e dhunshëm si një sfidë në nivel botëror, por edhe me krimin e organizuar dhe korrupsionin.
Zëri i Amerikës raporton se nënpresidenti Biden do të marrë pjesë sot në ceremoninë e emërimit të një rruge me emrin e dalit të tij të ndjerë Joseph “Beau” Biden. Rruga që do të mbajë këtë emër çon në Bondstell në kampin e disa qindra trupave amerikane që vazhdojnë të shërbejnë në kuadër të forcave paqeruajtëse të udhëhequra nga NATO-ja në Kosovë./tvklan.al
