Ministri i Mbrojtjes, Niko Peleshi ka shprehur ngushëllime për tragjedinë në Pejë, ku moti i keq u mori jetën dy personave, nënë e bir, pasi rrjedha e ujit përmbyti shtëpinë e tyre.
Përmes një postimi në rrjetin social Facebook, Peleshi thotë se ka komunikuar me kryetarin e komunës së Pejës mbi situatën e krijuar nga moti I keq.
Ai thotë se Shqipëria është e gatshme për të mbështetur banorët e Pejës dhe të Kosovës në kohë nevoje, në këto ditë të vështira.
“Ngushëllime familjes në Pejë për humbjen e dy jetëve, si pasojë e motit të keq.
Komunikova me kryetarin e komunës së Pejës Gazmend Muxhaheri, të cilit edhe në emër të Kryeministrit i shpreha ngushëllimet dhe gatishmërinë për mbështetje në çdo kohë që banorët e Pejës dhe Kosovës të kenë nevojë. Pranë vëllezërve tanë në këtë ditë të vështirë!”- shkruan Peleshi.
Kujtojmë që një grua bashkë me fëmijën e saj pesë vjeçar mbetën viktima të vërshimeve të mbrëmshme në qytetin e Pejës. Ngjarja e rëndë ndodhi në lagjen “Asllan Qeshme”.
Përveç, dy rasteve të vdekjeve deri tani janë lënduar edhe dy persona nё lagjen “Fidanishte”, të cilët janë duke marrë trajtim mjekësor./Opinion.al
