Pesëdhjetë e pesë marinarë kinezë dyshohet se kanë vdekur pasi nëndetësja e tyre është goditur me barriera të forta, të vendosur për të kapur nëndetëset britanike dhe amerikane në Detin e Verdhë.
DailyMail shkruan se sipas një raporti sekret në Mbretërinë e Bashkuar, marinarët dyshohet se humbën jetën pas një dështimi fatal të sistemeve të oksigjenit të nëndetëses që helmoi ekuipazhin.
Kapiteni i nëndetëses së Marinës Kineze PLA ‘093-417’ mësohet të jetë në mesin e të vdekurve, si dhe 21 oficerë të tjerë.
Zyrtarisht, Kina e ka mohuar incidentin të ketë ndodhur. Duket gjithashtu se Pekini refuzoi të kërkojë ndihmë ndërkombëtare për nëndetësen e tij të goditur. Raporti i Mbretërisë së Bashkuar për misionin fatal thotë:
‘Inteligjenca raporton se më 21 gusht ka pasur një aksident në bord gjatë kryerjes së një misioni në Detin e Verdhë. Incidenti ka ndodhur në orën 08.12 me pasojë vdekjen e 55 anëtarëve të ekuipazhit: 22 oficerë, 7 kadetë oficerë, 9 oficerë të vegjël, 17 marinarë. Të vdekurit përfshijnë kapitenin, kolonel Xue Yong-Peng.
Ne dyshojmë se vdekja është shkaktuar nga hipoksia për shkak të një defekti të sistemit në nëndetëse. Nëndetësja goditi një zinxhir dhe pengesë ankorimi të përdorur nga Marina Kineze për të bllokuar nëndetëset e SHBA-së dhe aleatëve. Kjo rezultoi në dështime të sistemeve. Sistemi i oksigjenit në bord e helmoi ekuipazhin pas një dështimi katastrofik”, shkruan tabloidi anglez, referuar informacionit nga MB.
Ende nuk ka asnjë konfirmim të pavarur për humbjen e dyshuar të nëndetëses kineze në domenin publik.
Pekini i ka hedhur poshtë spekulimet duke i cilësuar si ‘plotësisht të rremë’.
Ndërkohë, raporti i Mbretërisë së Bashkuar, i cili bazohet në inteligjencën e mbrojtjes, mbahet në një klasifikim të lartë./Opinion.al
