Të afërmit e viktimave të Masakrës së Srebrenicës kanë ngritur padi kundër Holandës në Gjykatën Evropiane për të Drejtat e Njeriut në Strasburg, lidhur me një vendim të muajit Korrik.
“Nënat e Srebrënicës ngritën sot një padi kundër shtetit holandez në Gjykatën Evropiane të të Drejtave të Njeriut”, thanë përmes një deklarate avokatët, Marko Gerritsen dhe Simon van der Slujis, duke e akuzuar shtetin holandez se nuk mori masa të mjaftueshme për të mbrojtur popullsinë.
Kujtojmë se mbi 8,000 burra dhe djem myslimanë janë vrarë nga forcat serbe të Bosnjës, të udhëhequra nga gjenerali Ratko Mlladiç, në korrik të vitit 1995 në Srebrenicë.
Asokohe, shumë prej viktimave kishin shkuar për t’u mbrojtur në zonën e shpallur si të sigurt nga Kombet e Bashkuara, por atje nuk kishte numër të mjaftueshëm të paqeruajtësve holandezë.
Gjykata e Lartë e Holandës konstatoi më 19 korrik se paqeruajtësit holandezë kanë vepruar në mënyrë të paligjshme kur i kanë evakuuar burrat nga baza e tyre ushtarake pranë Srebrenicës, më 13 korrik, 1995, duke i dorëzuar ata te forcat serbe të Bosnjës, edhe pse e kanë ditur se kanë qenë në rrezik serioz për t’u abuzuar ose vrarë megjithatë Holanda mban përgjegjësi “shumë të kufizuar”. Sipas vendimit të Gjykatës, Holanda ka vetëm 10 për qind të përgjegjësisë për vdekjen e 350 personave.
Ndërkaq masakra e Srebrenicës është cilësuar si më e rënda në Evropë që nga Lufta e Dytë Botërore./Opinion.al
