Biznesmeni Mirel Mërtiri është shpallur në kërkim ndërkombëtar nga policia, pas urdhër-arrestit të lëshuar nga SPAK.
Mërtiri është vënë nën akuzë për korrupsion në lidhje me aferën e inceneratorëve. Sipas News 24, SPAK i ka përcjellë policisë kërkesën për shpalljen në kërkim ndërkombëtar të biznesmenit.
Kujtojmë se Prokuroria e Posaçme akuzoi zyrtarisht biznesmenin Mirel Mërtiri për korrupsion dhe pastrim parash në lidhje me aferën e inceneratorit të Elbasanit më 15 nëntor të vitit të kaluar.
“Shtetasit Mirel Mërtiri, Stela Gugallja dhe Klodian Zoto, kanë konsumuar veprat penale të korrupsionit aktiv i funksionarëve të lartë shtetërorë” kryer në bashkëpunim dhe “pastrim i produkteve të veprës penale e kryer në rrethana cilësuese në bashkëpunim”, thuhej në aktakuzën e SPAK.
Ndërkohë në kërkim më herët u shpallën Stela Gugallja dhe biznesmeni tjetër Klodian Zoto.
Kujtojmë se më 7 shkurt u publikua lajmi se Stela Gugallja u paraqit në gjykatën austriake. Prokuroria e Posaçme u njoftua se në Gjykatën e Vjenës, në Austri, është duke u kryer procedura e ekstradimit të shtetases Stela Gugallja, nga Austria në Shqipëri, në zbatim të urdhrit të kërkimit ndërkombëtar për këtë shtetase.
