“Shqipëria është shumë pranë përmbushjes së kushteve për konferencën e parë ndërqeveritare”,- kështu është shprehur Komisioneri për Zgjerimin në BE, Oliver Varhelyi gjatë konferencës për paketën e zgjerimit të BE 2020 dhe Planin e Investimeve për Ballkanin Perëndimor.
Varhelyi ka deklaruar se Këshilli Europian po e konsideron vendimin për hapjen e negociatave me Shqipërinë dhe Maqedoninë e Veriut. Sipas tij, Shqipëria është drejt përmbushjes së kushteve për konferencën e parë ndërqeveritare.
“Këshilli po konsideron vendimin për negociatat me Shqipërinë dhe MV. Shqipëria është shumë pranë përmbushjes së kushteve për konferencën e parë ndërqeveritare. Kemi përgatitur planin ekonomik për Rajonin. Duhen më shumë grante se sa kredi. KE ka dhënë 20 mld euro në Ballkanin Perëndimor, dhe uroj që të marrë dritën jeshile për konferencën e parë ndërqeveritare. Këto vende janë fokusi kryesor i BE. KE propozon 9 mld euro të tjera për Ballkanin Perëndimor për periudhën 2021-2027. Shqipëria duhet të mbetet e angazhuar për vijimin e reformave. Shqipëria ka bërë progres të qendrueshëm në zbatimin e rekomandimeve të ODIHR. Rritja ekonomike në Ballkan është një nga qëllimet e BE-së.”,- ka thënë gjatë fjalës së tij Varhelyi.
Shqipëria vlerësohet në Raportin e Komisionit Evropian se ka shënuar përparim në reformat kyçe. Në raport thuhet se Shqipëria është mesatarisht e përgatitur me reformën e administratës publike, ku arritjet e prekshme, duhen fuqizuar më tej.
Edhe sistemi gjyqësor i Shqipërisë vlerësohet se është i përgatitur mesatarisht, ku ka vazhduar një reformë gjithëpërfshirëse dhe e plotë. Institucionet e reja për vetëqeverisjen e gjyqësorit kanë ecur me proceset për të mbushur vendet e lira në Gjykatën e Lartë dhe Gjykatën Kushtetuese.
Sipas raportit, rivlerësimi i përkohshëm i gjyqtarëve dhe prokurorëve, i njohur si vettingu, ka përparuar në vazhdimësi, duke sjellë rezultate të prekshme, pasi u trajtuan mbi 286 dosje dhe 62% e tyre sollën dorëheqje dhe shkarkime për pasuri të pajustifikuara.
Komisioni Europian vlerësoi se korrupsioni mbetet i përhapur dhe është një shqetësim serioz, por është bërë përparim në luftën kundër korrupsionit dhe se Shqipëria ka një nivel të caktuar të përgatitjes në luftën kundër tij. Një kapitull më vete Komisioni Europian i kushton edhe lirisë së shprehjes, ku theksohet se në dhjetorin e kaluar parlamenti miratoi një sërë ndryshimesh në ligjin e medias.
Ndryshimet vlerësohen se nuk janë në standardet dhe parimet ndërkombëtare të lirisë së medias dhe ngrenë shqetësime në lidhje me rritjen e censurës dhe vetëcensurës, dhe rreth pengesave të mundshme të lirisë së shprehjes në vend. Po ashtu, në raport ka edhe një pjesë kushtuar klimës politike dhe nevojës për dialog mes partive. Situata politike vlerësohet e tensionuar dhe nënvizohet nevoja për dialog dhe mirëkuptim./ Opinion.al
