Komisioneri i BE-së për Zgjerimin, Oliver Varhelyi, shprehu zhgënjimin për faktin që nuk është arritur një kompromis në lidhje me negociatat me Shqipërinë dhe Maqedoninë e Veriut.
Përmes një postimi në Twitter, ai thekson se bllokimi duhet thyer, pasi ky proces është i rëndësishëm jo vetëm për Ballkanin, por edhe BE-në.
Gjithashtu, ai thekson se me metodologjinë e rishikuar dhe Planin Ekonomik të Investimeve, rajoni ka një dritare për të ecur përpara.
“Të zhgënjyer që nuk mund të ecim përpara në kornizat e negociatave me Maqedoninë e Veriut & Shqipërinë, por shpresoj që në një periudhë shumë të shkurtër kohe do të jemi në gjendje. Ne kemi nevojë për të thyer bllokimin shpejt.
Kjo është e rëndësishme për Ballkanin Perëndimor dhe për BE. Me metodologjinë e rishikuar dhe Planin Ekonomik dhe të Investimeve ne kemi një dritare unike të mundësive për të çuar rajonin përpara dhe për të dhënë rezultate të prekshme. Ne do të vazhdojmë të punojmë për këtë qëllim” shkruan ai.
Kujtojmë se kuadri negociues me Shqipërinë dhe Maqedoninë e Veriut u hoq nga axhenda e ambasadorëve të Bashkimit Europian për shkak të mungesës së dakordësisë së Bullgarisë për Traktatit e Miqësisë me Maqedoninë e Veriut./ Opinion.al
