Ministri i Shtetit për çështje të Europës në qeverinë gjermane, Michael Roth, ka kërkuar fillimin e negociatave me Shqipërinë dhe Maqedoninë e Veriut për anëtarësim në BE.
“E kemi dhënë fjalën dhe duhet të mbajmë premtimet tona”, thekson Roth në një editorial të botuar të mërkurën në gazetën “Frankfurter Allgemeine Zeitung”. Sipas tij stabilizimi i Ballkanit është në interes të Gjermanisë. Roth thotë se BE ka arritur në përfundim se Tirana dhe Shkupi i kanë kryer detyrat e shtëpisë dhe i kanë plotësuar kushtet e vëna nga Këshilli Europian. Tani, shkruan Roth, BE duhet të veprojë, sepse bëhet fjalë për interesat e sigurisë dhe për kredibilitetin e BE-së.
Por kjo deklaratë duket se ka futur në ngërç qeverinë gjermane. Kërkesa e socialdemokratit Roth për hapjen e negociatave me Shqipërinë dhe Maqedoninë e Veriut ka nxitur reagime nga partia konservatore CDU e kancelares Angela Merkel.
Kryetari i Komisionit për Europën i parlamentit gjerman, pjesë e CDU-së së Angla Merkel, Gunther Kirchbaum është shprehur kundër fillimit të menjëhershëm të negociatave.
“Do të vijë tetori kur do të merret vendimi”, tha ai për agjencinë gjermane të lajmeve DPA. Kirchbaum përjashtoi mundësinë që vendimi të merret në qershor, siç ishte premtuar para një viti.
Përveç partisë së kancelares Merkel skeptike ndaj hapjes së negociatave janë edhe Holanda, Danimarka dhe Franca.
Kritikat e ministrit gjerman për opozitën shqiptare
Në editorialin e tij në gazetën “Frankfurter Allgemeine Zeitung” Michael Roth kritikon ashpër opozitën në Tiranë. Ajo, sipas tij, po arrin të prodhojë pamje dramatike në vend se në garën e ideve politike të matet me qeverinë në parlament, të cilin po e bojkoton.
“Në Shqipëri situata duket, në pamje të parë e ndërlikuar. Kjo për arsye se opozita ka arritur të prodhojë pamje dramatike – në vend që të matet në mënyrë konstruktive me qeverinë në garën politike të ideve në Parlament. Kjo politikë obstruktive dhe e papërgjegjshme nuk mund mbulojë gjithë atë që vendi ka bërë”, shprehet zoti Roth. Më pas, Ministri i Jashtëm gjerman flet edhe për reformën në drejtësi, duke thënë se i gjithë procesi po ndiqet nga ekspertë europianë./ Opinion.al
