Pas publikimit të progres-raportit të Komisionit Europian që rekomandon hapjen e negociatave për anëtarësim të Shqipërisë, ka ardhur dhe reagimi i ministrisë së Jashtme greke.
Teksa shprehet se dy vendet po punojnë për forcimin e marrëdhënieve, në njoftimin zyrtar të ministrisë theksohet se Shqipëria duhet të garantojë respektimin e minoritetit grek.
Ministria e Jashtme greke ka përsëritur se respektimi i të drejtave të minoritetit është dhe një nga pikat kryesore për hapjen e negociatave me BE.
Po ashtu në këtë njoftim thuhet se ndalimi nga KQZ i kandidimit të Fredi Bejlerin për bashkinë e Himarës është shkelje e të drejtave të minoritetit grek.
“Greqia është duke punuar për të përmirësuar marrëdhëniet dypalëshe me Shqipërinë dhe mbështet procedurën për anëtarësimin në Bashkimin Europian, në kushtet që janë zbatuar për të gjitha vendet e anëtarësuara, duke përmbushur të gjitha kërkesat. Siç është bërë e qartë në raportin e Komisionit Europian, respektimi i të drejtave të minoritetit grek është i lidhur drejtpërdrejt me perspektivën europiane të Shqipërisë dhe është pjesë integrale e pesë prioriteteve kryesore për hapjen e negociatave të vendit për anëtarësim në BE, përmbushja e të cilave do të trajtohet nga Këshilli i Europës. Në këtë kontekst, ne presim garanci për të drejtat e minoritetit në të gjithë Shqipërinë, një masë që Shqipëria kishte ndërmarrë për ta miratuar deri në Maj 2018, dhe zbatimin e ligjit të pronësisë për anëtarët e minoritetit. “Së fundmi, po vëmë re metoda që synojnë të anulojnë kandidaturën e kreut të OMONIA-s Fredi Bejleri për Bashkinë e Himarës në zgjedhjet e ardhshme vendore. Këto veprime shkelin të drejtën e përfaqësimit politik të minoritetit grek për zgjedhjet në Himarë. I bëjmë thirrje Shqipërisë që të kthehet në rrugën e përparimit dhe jo të bëjë prapa, në mënyrë që procesi i saj i pranimit të përparojë“,-thuhet njoftimi./ Opinion.al E.Xh.
