Presidenti Ilir Meta ka zhvilluar ditën e sotme një bisedë me raporteren për Shqipërinë në PE, Isabel Santos dhe ambasadorin e BE-së, Luigi Soreca. Në fokus të bisedës online ka qenë çështja e negociatave.
Nëpërmjet një postimi në llogarinë e tij në “Facebook”, Meta ka ndarë bisedën e sotme ku ndër të tjera ka falenderuar eurodeputeten Santos për projek rezolutën për Shqipërinë. Kjo projekt rezolutë ka në fokus lirinë e medias, zgjedhjet e ardhshme dhe shpupullimin e vendit.
Ndërkaq, Meta ka siguruar që si President i vendit do të bëjë çdo përpjekje për zbatimin e të gjitha kushteve që lidhen me hapjen e negociatave.
Postimi i Presidentit Meta:
Kënaqësi të zhvilloja sot një bashkëbisedim të sinqertë e miqësor me Raporteren për Shqipërinë në Parlamentin Europian, eurodeputeten Isabel Santos, dhe Ambasadorin e Delegacionit të BE në Tiranë, zotin Luigi Soreca.
Një falënderim i veçantë për zonjën Santos, për vëmendjen e posaçme që i ka kushtuar në Projekt Rezolutën për Shqipërinë zgjedhjeve të ardhshme, fenomenit të shpopullimit dhe cenimit të lirisë së medias në Shqipëri.
E sigurova se si President i Republikës do të vazhdoj të bëj çdo përpjekje për zbatimin e plotë të të gjitha kushteve, që lidhen me nisjen e negociatave të anëtarësimit.
Integrimi europian i Shqipërisë kalon vetëm përmes zgjedhjeve të lira dhe të ndershme dhe ndërtimit të shtetit ligjor me institucione të pavarura dhe funksionale./ Opinion.al
