Qeveria federale gjermane është pro çeljes së negociatave për anëtarësim me Shqipërinë. Këtë e ka bërë të ditur sot vetë kancelarja Angela Merkel gjatë një konference për shtyp me kryeministren serbe Ana Brnabiç.
“Nuk mund të flas për vendet e tjera pasi ato vendosin vetë, por së pari mund të them për pozicionin gjerman, i cili lidhet me Bundestagun gjerman. Qeveria ka dhënë një rekomandim pozitiv për të dy vendet me specifikat e veta, si për Maqedoninë e Veriut ashtu dhe për Shqipërinë, deklaroi Merkel duke por ajo shtoi se “është Bundestagu ai që do të vendosë dhe besoj së shpejti do të kemi një vendim”.
Deklarata e kancelares gjermane vjen pas daljes së artikullit të DW i cili citonte burime nga qarqet e grupit parlamentar CDU/CSU se Shqipërisë do ti vendosen 9 kushte të reja për celjen e negociatave.
Megjithëse qeveria gjermane ka dhënë aprovimin për hapjen e negociatave, është Bundestagu ai që ka fjalën e fundit dhe ndarja brenda tij në lidhje me Shqipërinë është pranuar edhe nga ministri i Jashtëm Heiko Mass dhe Kreu i Komitetit të Çështjeve Europiane të Bundestagut, Günter Krichbaum.
Sa i përket marrëdhënieve Kosovë – Serbi, Merkel tha se nuk ishte e kënaqur me gjendjen aktuale dhe theksoi se normalizimi i marrëdhënieve midis dy shteteve është një nga parakushtet për anëtarësimin në BE. /Opinion.al
