Kreu i Grupit Parlamentar të Partisë Socialiste, Taulant Balla, foli për mediat pas përfundimit të takimit të drejtuesit politikë të PS në qarqe. Në këtë takim ishin të pranishëm kryeministri Edi Rama dhe ministrat.
Teksa zbardhi detaje nga ky takim, Balla foli edhe për raportin e ministrit të jashtëm holandez Stef Blok, në të cilin theksohet se Shqipëria nuk është gati për mbajtjen e Konferencës së Parë Ndërqeveritare, pasi nuk ka përmbushur plotësisht kushtet për fillimin e bisedimeve për hapjen e negociatave.
Balla tha se vlerësimi zyrtar i Integrimit të Shqipërisë bëhet nga Këshilli Europian dhe se presidenca gjermane ka në objektivat e veta mbajtjen e Konferencës Ndërqeveritare.
Ai theksoi se Shqipëria do të ketë së shpejti mbajtjen e Konferencës Ndërqeveritare, pasi sipas Ballës, Shqipëria i ka përmbushur kushtet.
“Presidenca gjermane që përfundon në 31 dhjetor të këtij viti, kanë në objektivat e veta mbajtjen e konferencave të para ndërqeveritare me Shqipërinë dhe Maqedoninë e Veriut. Përsa i përket vlerësimit nëse Shqipëria i ka plotësuar detyrat e veta apo jo, vlerësimi i vetëm zyrtar është vlerësimi i Komisionit Europian që paguhet nga taksapaguesit europianë për të bërë vlerësim korrekt të pritshmërive dhe të përmbushjes së parakushteve që vendet si ne kanë pasur nga Këshilli Europian i 25 marsit deri në fund të tetorit për detyrat. Komisioni Europian ka vlerësuar së Shqipëria i ka përmbushur parakushtet për mbajtjen e Konferencës së Parë Ndërqeveritare. Kam pasur një videokonferencë me Parlamentin Holandez, specifikisht me Komitetin për Çështjet Europiane në këtë Parlament ku edhe nga kolegët morëm vlerësimet për përmbushjen e disa kushteve,”-tha Balla./ Opinion.al
