Ish-ministri i Jashtëm Ditmir Bushati, ka folur në lidhje për shtyrjen e negociatave për në muajin tetor.
Në një intervistë për “Euronews”, Bushati është shprehur se shtetet anëtare të BE nuk e kanë mbajtur premtimin e dhënë ndaj Shqipërisë.
Teksa ka folur për krizën politike në vend, ish-ministri tha se palët duhet të gjejnë kompromisin dhe t’i japin përparësi agjendës kombëtare të integrimit.
“Unë do të doja të shprehja zhgënjimin tim ndaj vendeve anëtare të BE, të cilat nuk iu përmbajtën konkluzioneve te qershorit të vitit 2018, ku u përcaktua rruga për Shqipërinë dhe Maqedoninë e Veriut. Në bazë të këtyre konkluzioneve, qershori i vitit 2019 do të ishte momenti kur do vendosej data për çeljen e negociatave të anëtarësimit në BE. Është e qartë që pozicioni i disa vendeve anëtare po bëhet më i ftohtë, për të mos thënë armiqësor, për arsye të tyre të brendshme, në lidhje me politikën e zgjerimit.Unë besoj se protestat janë shprehje e demokracisë. Në disa raste ne shohim protesta dhe në vende tjera të BE. Nga ana tjetër, dhuna është dënuar dhe ka nevojë të dënohet. Mbi të gjitha, nga ata politikanë e forca politike që e kanë mbështetur atë si instrument. Mendoj se ka rëndësi të madhe që të gjitha forcat politike të tregojnë pëegjegjshmëri, sepse kur flasim për procesin e anëtarësimit të Shqipërisë në BE, kjo është një çështje kombëtare dhe prioritet kombëtar”,-tha Bushati./ Opinion.al E.Xh
