Negociatat mes dy partive që morën numrin më të madh të votave në Maqedoni, për formimin e qeverisë së re janë në fazë kritike. VMRO-DPMNE e Nikolla Gruevskit nuk pranon në asnjë mënyrë dy prej kërkesave të BDI-së së Ali Ahmetit. E para: për zyrtarizimin e Shqipes, si gjuhë e dytë në Maqedoni dhe e dyta për zgjatjen e mandatit të Prokurorisë Speciale.
“Koalicioni me 25 parti ‘Për një Maqedoni më të mirë’, udhëhequr nga VMRO-DPMNE konfirmon se shtrirja e dygjuhësisë në gjithë territorin e vendit dhe zgjatja e mandatit të Prokurorisë Speciale nuk negociohen”, thuhet në deklaratën për mediat. Në deklaratë thuhet gjithashtu se kjo parti është e gatshme që të heqë dorë nga pushteti dhe nuk pranon këto dy kushte të partisë shqiptare.
Më herët, Kryesia Qendrore e BDI-së doli me një deklaratë me katër kushte të panegociueshme për formimin e qeverisë. Së pari, BDI radhit përdorimin e barabartë dhe zyrtar të gjuhës shqipe, integrimin në NATO, integrimin në BE dhe vazhdimin e mandatit të Prokurorisë Speciale.
