Një ngjarje e rëndë u shënua mbrëmjen e djeshme në lagjen “Pavarësia” në Vlorë. Ende nuk ka asnjë të arrestuar për atentatin me armë ku mbeti i plagosur rëndë 41 vjeçari Mikel Mehmeti. Ai ka marrë plumba në gjoks e kokë dhe është në gjendje shumë të rëndë. Mëngjesin e sotëm mësohet se është transportuar nga Vlora në Tiranë.
Policia dyshon se atentati ka qenë i mirëorganizuar. Mehmeti u qëllua ndërsa udhëtonte me një automjet ‘Audi’ me targa AA 653 VC bashkë me një person tjetër. Autorët kanë braktisur motorin në një tjetër zonë, duke u larguar më pas me një automjet. Në afërsi të stacionit të trenit, në një zonë informale është gjetur një makinë e djegur terësisht, e cila dyshohet se është përdorur nga autorët.
Shqiptarja.com raporton se Mikel Mehmeti njihet si anëtar i bandës së Llanajave. Ata akuzohen për masakrën e Colës, ku pas një sherri në kazino në prill të vitit 2015, u vranë 3 të rinj. Një nga autorët e masakrës është Aleksandër Llanaj, që po vuan dënimin në burg. Rruga ku ndodhi ngjarja e mbrëmshme njihet si një rrugë ku kanë ndodhur të tjera ngjarje kriminale, ku e fundit ishte vrasja e biznesmenit Vasil Dervishaj më 7 qershor 2018.
*Pamje nga vendi i ngjarjes
