Teksa në komunat në Veri të Kosovës, serbët lokalë kanë dalë të protestojnë, protesta ka edhe në jug të Mitrovicës.
Raportohet se një grup qytetarësh shqiptarë janë mbledhur në Mitrovicën e Jugut.
Nga mediat në Kosovë raportohet për dhjetëra tubues. REL thotë se mes tyre ka edhe qytetarë nga Shqipëria. Disa prej protestuesve janë shprehur se kanë dalë në protestë në “mbështetje të Policisë së Kosovës”.
Ndërkaq në vendngjarje ka prani të forcave të policisë.
Vetë autoritetet policore të Kosovës më herët bënë thirrje që qytetarët të mos i bashkohen një proteste të tillë pasi thirrja nga mediat sociale vjen nga profile të dyshimta të cilat mund të kenë një qëllim të keq.
Edhe ministri i Brendshëm, Xhelal Sveçla, tha se thirrjet e tilla “nuk ndihmojnë” Kosovën.
