Drejtuesi i Qendrës “Alert”, Granit Sokolaj solli në vëmendje gjatë emisionit “Historia Ime” një rast që aktualisht është duke e hetuar.
Ai deklaroi se pas analizave të bëra në laborator, aktualisht në treg ka djathë me stafilokok në rrjetin e dyqaneve të bulmetit.
Djathi i marrë nën shqyrtim është i paambalazhuar me një etiketë të vendosur nga vetë marketi, jo nga kompanitë industriale që për hir të së vërtetës, kanë standarde dhe një zinxhir shumë të mirë kontrolli.
Sokolaj tha se baxhot që nuk plotësojnë kushtet e higjienës sanitare përdorin nitrate, që janë lëndë të dëmshme për organizmin, për ruajtjen e produkteve dhe luftimin e ngarkesave bakteriale.
Gjithashtu, të ftuarit theksuan se në treg nuk ka produkte bio. Produktet bio nuk mund të jenë të tilla nëse nuk shoqërohen me vulën e miratuar nga Bashkimi Europian, që është gjethja e gjelbër.
Hasan Stafa: Produkte bio nuk ka. Ka produkte natyrale dhe produkte të përpunuara.
Granit Sokolaj: Nuk mund të jetë bio pa vulën bio, të pacertifikuara.
Mirela Milori: Po dyqanet e dedikuara, dyqanet organikë, bio që shkon dhe blen?
Granit Sokolaj: Nëse është i etiketuar me gjethen që e përdor Bashkimi Europian për bion, është. /tvklan.al
