Prokurori i Durrësit, Arjan Ndoj përballet sot me Komisionin e Pavarur të Kualifikimit. Prokurori Ndoj ka dalë për verifikim për kriterin e figurës dhe atë të profesionalizmit.
Për të dy këto kritere KPK ka gjetur parregullsi. Sa i përket figurës, është konstatuar se prokurori ka pasur kontakte me persona të papërshtatshëm, me njërin prej të cilëve ka qenë edhe në makinë.
Gjithashtu, është konsideruar problematike prania e dosjeve në automjetin ku ndodhi atentati ndaj tij, dosje që konsideroheshin të humbura nga Prokuroria e Durrësit.
Vetë prokurori ka kundërshtuar këto gjetje, duke i konsideruar jo të bazuara në prova, por vetëm në gjetje mediatike.
Ndërsa në një prononcim për mediat prokurori Ndoj ka thënë se nuk ka bërë asnjë akuzë për askënd, ndërsa shtoi se vetëm ka mbrojtur veten përballë aludimeve siç i quajti ai.
“Nuk kam bërë akuza për askënd, unë thjesht kam mbrojtur veten përpara aludimeve që janë bërë për mua”,-tha prokurori.
Kujtojmë se prokurori Arjan Ndoj ka qenë pre e një atentati të ndodhur më 1 nëntor 2019 në autostradën Tiranë-Durrës. Atentati iu bë teksa ai po lëvizte me automjet me një person me precedentë penalë, Aleksandër Lahon të njohur si i “forti i Sukthit” dhe shoferin e tij Andi Malokun.
Ndaj automjetit tip “Benz” u qëllua me breshëri automatiku nga një tjetër automjet. Pas breshërisë së tetë plumbave makina doli nga rruga dhe për pasojë humbi jetën shoferi, Andi Maloku./Opinion.al
