U arrestua nga policia për ushtrim të një aktiviteti të paligjshëm. Por menaxherja e një qendre SPA në kryeqytet ka jetuar një jetë plot pasione e pushime vanitoze.
33-vjeçarja R. Marashi ra në prangat e policisë, pasi në qendrën SPA që ajo menaxhonte ofroheshin në mënyrë të paligjshme edhe shërbime seksuale me pagesë.
Pa zbuluar identitetin e saj “Panorama” publikon foto të menaxheres. Fotot jane postuar në rrjetet sociale. Shihet se ajo bën një jetë vanitoze, me pushime të gjata kryesisht në bregdetin e jugut, por edhe jashtë vendit, ndërsa zbulohet se ka pasion edhe palestrën.
Menaxherja, e cila akuzohet për veprat penale “Shfrytëzim i prostitucionit” dhe “Mbajtja e lokaleve për prostitucion”, një vit më parë ka marrë pjesë në një aktivitet të Dhomës së Tregtisë dhe Industrisë Tiranë, që ka pasqyruar edhe në rrjetet sociale.
Në profilin e saj në Facebook, nuk mungojë gjithashtu as fotot që shpërndan nga palestra. Gjithashtu ajo shperndan fotot edhe nga SPA-ja ku zhvillohej aktiviteti i jashtëligjshëm.
Ndërsa në faqet e qendrës së masazheve në rrjetet sociale, që ndodhet jo larg zonës së “Pazarit të ri”, postimet janë ato të zakonshmet për një biznes të këtij lloji.
Një vit më parë, qendra e masazheve ku ushtrohej prostitucion, është reklamuar edhe në një televizion kombëtar, gjatë një emisioni.
33-vjeçarja bashkë me A.T., 32 vjeçe, administratoria e qendrës së masazhit (e cila është në kërkim), sipas Policisë: vinin në dispozicion ambientet e qendrës së masazhit për të ushtruar prostitucion nga vajzat e punësuara, të cilat iu ofronin klientëve meshkuj shërbime “Extra” kundrejt pagesës.
Njoftimi i i policisë për arrestimet në qendrën e masazhit
Arrestohet menaxheria e një qendre masazhi për veprat penale “Shfrytëzim i prostitucionit” dhe “Mbajtja e lokaleve për prostitucion” dhe shpallet në kërkim administratoria.
Procedohen në gjëndje të lirë dhe tre punonjëse të qendrës së masazhit.
Seksioni për Hetimin e Trafiqeve të Paligjshme në D.V.P. Tiranë në kuadër të operacionit policor të koduar “Extra Service 2”, bëri arrestimin e shtetases :
– R. M., 33 vjeçe, banuese në Tiranë, menaxhere e një qendre masazhi në kryeqytet.
Si dhe u shpall në kërkim administratoria e qendrës së masazhit, shtetasia :
– A. T., 32 vjeçe, banuese në Tiranë.
Këto shtetase vinin në dispozicion ambientet e qendrës së masazhit për të ushtruar prostitucion nga vajzat e punësuara të cilat iu ofronin klientëve meshkuj shërbime “Extra” kundrejt pagesës.
Në cilësinë e provës materiale u sekuestruan :
– 7 aparate celualar dhe 1 bllok shënimesh
Materialet iu referuan Prokurorisë së Rrethit Gjyqësor Tiranë në ngarkim të shtetaseve R. M., dhe A. T., për veprat penale “Shfrytëzim i prostitucionit” dhe “Mbajtja e lokaleve për prostitucion” parashikuar nga nenet 114 dhe 115 të Kodit Penal.
