Në Shqipëri, deri në 10 Mars në qeli, si të dënuar dhe në paraburgim si të dyshuar për një krim, ishin 5026 persona.
Të dhënat zyrtare të Drejtorisë së Përgjithshme të Burgjeve tregojnë se peshën më të madhe të personave që popullojnë institucionet e vuajtjes së dënimit në vend, e zënë të paraburgosurit me gati 55%.
Kështu deri në Shkurt të këtij viti, 2760 qytetarë, nën hetim nga të gjitha prokuroritë në vend, pjesa më e madhe për çështje të drogës, ndodhen në qeli. Deri në të njëjtën periudhë kohore, 1729 ishin të dënuar dhe gjetur fajtor nga Gjykata dhe pjesa më e madhe të dënuar për vrasje.
Në dhjetë ditë, Burgjet pritën 537 persona të tjerë dhe në 10 Mars kishin bosh 721 shtretër.
Në katër vitet e fundit, kapaciteti i institucioneve të vuajtjes së dënimit është ulur deri në 213 vende të lira nga numri total i shtretërve prej 5747.
Ndërkohë, të dhënat e siguruara nga Shërbimi Korrektues i Kosovës, tregojnë një realitet të përmbysur.
Në Kosovë numri i të dyshuarve që mbahen në qeli, është vetëm një e treta e të dënuarve. Konkretisht, nga 1758 persona që janë në qeli, 1167 janë të dënuar dhe 591 janë të paraburgosur ose vetëm 33% e totalit.
Të dhënat statistikore flasin për politika më të lehta në masat e sigurimit nga Drejtësia në Kosovë, se ajo në Shqipëri, e kritikuar së fundmi për këtë qasje.
Ndërkohë Gjykata e Strasburgut në dy vendime të dhëna në 2023 dhe 2025 argumenton se drejtësia në Shqipëri nuk kishte arritur të arsyetonte masën e “Arrestit në burg” caktuar ndaj dy të hetuarve që fituan shpërblim, edhe pse ata në finale janë gjetur fajtor./ Tv Klan
