Gjashtë punonjës policie, mes tyre dy efektive femra, janë lënduar dhe kanë marrë ndihmë mjekësore gjatë përplasjes në protestën e sotme të opozitës kundër zgjedhjes së Prokurorit të Përgjithshëm të Përkohshëm.
Përmes një njoftimi për mediat, policia ka bërë me dije se bëhet fjalë për efektivët O.M, V.T dhe M.A të Forcave të Posaçme “Shqiponja”, si dhe N.K, E.X dhe D.B, efektivë policie të Komisariatit të Policisë nr.1, prej tyre dy femra.
Policia e Shtetit ka theksuar se në bashkëpunim me prokurorinë e Rrethit Gjyqësor Tiranë po vijon verifikimet për identifikimin e gjithë personave, të cilët kanë ushtruar dhunë gjatë protestës.
Mësohet se pesë persona janë shoqëruar prej forcave të rendit pas protestës së opozitës.
Shkak i ndalimeve kanë qenë kundërshtimi i urdhrave të forcave të rendit si dhe goditja ndaj uniformës së policisë. Si pasojë e përplasjeve një prej efektivëve ka mbetur i plagosur lehtë.
