Qindra qytetarë të qarkut të Kukësit dhe shumë të tjerë të ardhur nga Kosova, pas katër orësh përleshje me forcat e policisë, kanë arritur një marrëveshje për t’u tërhequr nga Rruga e Kombit dhe për të lejuar udhëtimin normal të automjeteve që qarkullojnë nga Kosova drejt Shqipërisë dhe anasjelltas.
Mësohet se marrëveshja është arritur mes një grupi protestuesish dhe disa zyrtarëve të lartë të Policisë së Shtetit, të ardhur nga Tirana.
Drejtori për Rendin dhe Sigurinë, si dhe Nëndrejtori i Policisë së Shtetit, Gjovalin Loka kanë qenë dy personat që kanë hyrë në bisedime me protestuesit, si dhe kanë arritur një marrëveshje që turma e madhe e njerëzve të shpërndahej.
Protestuesit, të ardhur nga disa zona të qarkut të Kukësit dhe shumë të tjerë nga Kosova, filluan të mblidheshin rreth orës 10:00 pranë tunelit të Kalimashit dhe vetëm pak metra nga kabinat e pagesës së tarifës së rrugës.
Fillimisht protesta ishte e qetë, por degjeneroi në dhunë dhe përleshje mes forcave të rendit dhe protestuesve.
Këta të fundit, shkatërruan me gurë, por edhe i vunë flakën objektit të koncesionarit për mbledhjen e taksës.
Është bërë me dije se qarkullimi i makinave ka nisur.
