Kina ka përsëritur sërish kërcënimin e saj për përdorimin e forcës ushtarake për marrjen e kontrollit të Tajvanit, në kohën kur veprimet ushtarake kineze kanë ngritur tensionet mes palëve në nivelin e tyre më të lartë në vite.
Në deklaratën e Zyrës për Çështje të Tajvanit thuhet se Pekini “do të punojë me sinqeritetin më të madh dhe do të bëjmë përpjekje që ribashkimi të arrihet në mënyrë paqësore”. “Por, ne nuk e përjashtojmë mundësinë e përdorimit të forcës dhe ne e rezervojmë mundësinë e ndërmarrjes së të gjitha masave të nevojshme. Kjo bëhet për t’u mbrojtur nga ndërhyrjet e jashtme dhe nga të gjitha aktivitetet separatiste”, u tha në deklaratë.
“Ne do të jemi gjithmonë të gatshëm të përgjigjemi duke përdorur forcën ose mjetet e tjera të nevojshme për të parandaluar forcat e jashtme ose veprimet radikale të elementeve separatiste. Qëllimi ynë përfundimtar është të sigurojmë perspektiva të ribashkimit paqësor dhe të shtyjmë përpara këtë proces”, u shtua në deklaratën e Zyrës kineze për Çështje të Tajvanit.
Deklarata e pasoi pothuajse një javë gjuajtje me raketa dhe inkursione në ujërat dhe hapësirën ajrore të Tajvanit nga anijet luftarake kineze dhe avionët e forcave ajrore.
Veprimet kanë ndërprerë fluturimet dhe transportin në një rajon thelbësor për zinxhirët e furnizimit global, situatë kjo që ka sjellë reagime të forta nga SHBA, Japonia dhe të tjerët.
Kina thotë se lëvizjet kërcënuese u nxitën nga një vizitë në Tajvan javën e kaluar nga kryetarja e Dhomës së Përfaqësuesve të SHBA, Nancy Pelosi, por Tajvani thotë se vizita të tilla janë rutinë dhe se Kina e përdori atë thjesht si një pretekst për të rritur kërcënimet e saj.
Në një përgjigje shtesë ndaj vizitës së Pelosit, Kina tha se po ndërpret dialogun për çështjet që nisin nga siguria detare deri te ndryshimet klimatike me SHBA-në, mbështetësin kryesor ushtarak dhe politik të Tajvanit.
Ministri i Jashtëm i Tajvanit paralajmëroi të martën se stërvitjet ushtarake kineze pasqyrojnë ambiciet për të kontrolluar pjesë të mëdha të Paqësorit perëndimor.
Strategjia e Pekinit do të përfshijë kontrollin e deteve të Kinës Lindore dhe Jugore nëpërmjet ngushticës së Tajvanit dhe vendosjen e një bllokadë për të parandaluar SHBA-në dhe aleatët e saj të ndihmojnë Tajvanin në rast të një sulmi, tha Joseph Wu në një konferencë shtypi në Taipei.
