Dy ditë pas mbërritjes në Antalya, aty ku më 13 Nëntor do të luhet edhe miqësorja me Turqinë, Christian Panucci rrit intensitetin e stërvitjes së lojtarëve që ka grumbulluar.
Italiani për këtë të mërkurë kishte parashikuar dy seanca stërvitore. Në atë të paradites, ekipi i është nënshtruar një programi të veçantë sa i përket repartit të mbrojtjes e më pas u vijua me grupin tjetër, atë të pjesës ofensive te mesfushës dhe sulmit.
Ashtu siç pranoi edhe në konferencën për shtyp pak kohë më parë, Panucci po përpiqet të rrisë cilësinë e skuadrës si grup duke qenë se Shqipëria nuk mbështetet mbi talente individuale.
Të martën skuadrës i është bashkuar edhe Kamer Qaka si dhe Astrit Ajdarovic. Pas ndeshjes së shpresave më 10 Nëntor me Irlandën do ti bashkohet edhe Ylber Ramadani.
“Çdo lojtar e pret me kënaqësi grumbullimin me kombëtaren e parë. Qoftë edhe një minutë të luash nuk do të kursehem me U21 se kjo skuadër më ka bërë të luaj me kombëtaren. Do të jap maksimumin me U-21 dhe pastaj do ti bashkohem skuadrës”.
Teksa kuqezinjtë përgatiten për ndeshjen, kombëtarja turke e drejtuar nga rumuni Mircea Lucesku ka udhëtuar drejt Rumanisë për një miqësore këtë të enjte me kombëtaren vendase.
Tv Klan
