Sekretari i Përgjithshëm i Partisë Socialiste, Blendi Klosi është i besimit se brenda kësaj force politike nuk ka një luftë të brendshme, duke e quajtur ndryshe si konkurrencë që i shërben gjithsecilit për të bërë më të mirën gjatë fushatës elektorale për zgjedhjet parlamentare të 11 Majit.
Në një intervistë të dhënë për Klan News, Klosi specifikoi se në këtë fushatë ata kanë zgjedhur të jenë të vetëm në betejën për një tjetër mandat zgjedhor, duke ironizuar kështu dhe lëvizjet e partive të tjera që kanë krijuar koalicione. Shkon dhe më tej duke thënë se kjo diferencë mes tyre do të ndikojë në një rezultat shumë të madh në favor të Partisë Socialiste për të marrë një tjetër mandat qeverisës.
“Mendoj që nuk është e drejtë fjala luftë, është konkurrencë dhe është konkurrencë krejt e pranueshme, krejt normale. Janë 40 ditë garë dhe gara është me Partinë Demokratike, me opozitën. Natyrisht gara jonë është një garë që ne e kemi përcaktuar nga 2017-ta që të jemi të vetëm në listë. Jemi në aleancë vetëm me qytetarët, jo me parti të tjera dhe prandaj, qartazi në këtë fushatë, jemi përballë të gjithë kampeve të tjera, opozitave të reja apo opozitave të vjetra. Por që jemi në konkurrencë, jo vetëm me partitë opozitare, por ka një konkurrencë të ndershme brenda kampit socialist, gjë që po të shikosh në krahun tjetër nuk shikon. Pra është e vështirë të shikosh figura të spikatura të garës së Partisë Demokratike në gjithë Shqipërinë në qarqet e caktuara, në Tiranë që është dhe beteja kryesore. Po kështu dhe në qarqet e tjera. Vështirë se gjen figura që kanë, le të themi, reputacion lokal apo që kanë një zë le të themi të njohur në publik, emra që njerëzit mund t’i referohen, votuesit e të djathtës mund t’i referohen. Pra mungesa e këtij lloj konkurrimi të brendshëm dhe pozitiv do të ndikojë dhe kjo në rezultatin maksimal të votave të Partisë Socialiste në qarqe, por dhe në një mangësi të kampit opozitar që përsëri nuk ia doli që të dilte mbi ato le të themi konjukturat e tyre të brendshme”, u shpreh Blendi Klosi.
Opozita, sipas këndvështrimit të Klosit, e ka humbur sensin e të fituarit në zgjedhje. Thekson faktin se Partia Demokratike ka përfunduar në fraksione, përforcon idenë se opozita është e shpërndarë dhe s’mund t’i besohet.
“Është fakt që në 4 vjet ne mund të numërojmë shumë arritje të qeverisjes socialiste, ndërsa në kampin opozitar dhe në kampin e Partisë Demokratike, një gjë mund të thuash që në 4 vjet që nga një parti të drejtuar nga Sali Berisha dhe Lulzim Basha, së bashku në 2021-shin tani janë 4 parti dhe ato drejtohen nga zoti Basha, zoti Alibeaj, zoti Shehaj. Pra është qartazi e dukshme që ato lloj personalitetesh që krijon opozita se dhe ne kemi qenë në opozitë dhe kemi bërë një opozitë shumë të fortë. Shumë shokë dhe shoqe që sot janë në parlament vijnë dhe nga parlamenti i opozitës kur realisht lufta opozitare të evidenton. Po të punosh, po të përpiqesh, padyshim krijon personalitete dhe kuadro dhe njerëz me personalitet dhe në opozitë. Partia Demokratike fatkeqësisht është shkërmoqur, vjen në këtë garën e 11 Majit e ndarë në 4 pjesë, me drejtues me ekipe drejtuesish.
Po të shikosh mënyra se si u përzgjodh, si u tallën me Primaret, se si një mekanizëm që le të themi donin ta fusnin për mirë në parti iu erdhi keq. Tani kjo është politika, kjo është gara, ky është mekanizmi dhe ai mekanizmi që prodhoi humbje në zgjedhjet e 2023-shit, ku nga 61 bashki të vendit humbën 55. Unë e kam thënë në shumë studio kur jam pyetur për këtë proces. Nuk ka asnjë libër elektoral që të jep këtë mekanizëm ta përdorësh para garës. Para se të fillonte gara, bënë një garë të brendshme, kampet ndahen dhe për më keq, përfituesit e garave në shumë qarqe, as nuk u morën në konsideratë, as nuk u futën fare në lista. Pra ka një gjë që nuk shkon për mënyrën se si ata mendojnë, si funksionojnë dhe mesa duket janë të destinuar të humbasin dhe të humbasin më keq se 2021-shi”, shpjegoi deputeti socialist.
Fitorja më 11 Maj më e thellë për Partinë Socialiste?
Deputeti socialist u shpreh optimist gjithashtu për rezultatin më 11 Maj, duke shpresuar që në qarqet në të cilat nuk është arritur ajo çfarë duhej në zgjedhjet e kaluara, të arrihet këtë vit.
“Unë nuk di të them shifra, po duket qartazi që në çdo qark kemi të gjitha arsyet për të shkuar në një rezultat më pozitiv. Sidomos në qarqet që ky maksimum nuk ishte arritur në zgjedhjet e kaluara”, përfundoi Klosi.
/tvklan.al
