Plagosja me armë zjarri e kryer mbrëmjen e së mërkurës në Yzberisht ka për autorë dy persona me precedent penalë. Deri tani policia ka arrestuar 24-vjeçarin Iljaz Avdillari i cili është arrestuar në vitin 2012 pasi në bashkëpunim me dy persona të tjerë kanë vjedhur një sasi të konsiderueshme hekuri në një kompani materialesh ndërtimi dhe më pas kanë lidhur dhe dhunuar rojen e sigurisë.
Por kushëriri i tij i shpallur në kërkim, Fatmir Avdillari, ka një të shkuar të njohur kriminale. Ai njihet ndryshe si “Xubi” dhe së bashku me vëllanë Ilirin ka qenë pjesë e bandës së Yzberishtit në vitin 1997. Kjo bandë është akuzuar për shumë vepra penale, ndër të cilat edhe vrasje.
“Xubi” ka qenë i dënuar me 12 vite burg por ka dalë nga qelia në vitin 2018. Megjithatë vetëm një vit më vonë, më 11 Prill 2009, ai ekzekutoi Ardian Tahirin me një plumb në kokë në rrugën “Irfan Tomini” në Tiranë. Fatmir Avdillari e pranoi këtë krim me arsyetimin se kishte dyshime se Tahiri i kishte vrarë vëllain, Fiqiri Avdillarin në Athinë. Ky i fundit ishte ekzekutuar në fillim të vitit 2008, kohë kur Fatmiri ishte në burg, dhe më pas ishte djegur.
Pavarësisht deklarimeve të ‘Xubit’ prokuroria dyshonte se konfliktet e tyre kanë qenë të hershme. Ai u dënua përsëri por doli nga burgu në vitin 2017 për tu akuzuar sërish për trafik droge.
Ndërkohë që vëllai i ‘Xubit’ Ilir Avdillari ka qenë dënuar për vrasjen e biznesmenit italian Stefano Rossi më 27 janar 1998. Rossi sapo kishte tërhequr 30 milionë lireta nga banka dhe u ekzekutua vetëm 100 metra larg fabrikës së tij. /Opinion.al
