Stela Gugallja, një prej personave të shpallur në kërkim në lidhje me aferën e inceneratorëve, është ndaluar në Austri.
Mësohet se Prokuroria e Posaçme është njoftuar se në Gjykatën e Vienës, ne Austri, është duke u kryer procedura e ekstradimit te Gugalles, nga Austria në Shqipëri, në zbatim te urdhrit të kërkimit ndërkombëtar.
Për ketë qëllim, Prokuroria e Posaçme ka përcjellë nëpërmjet Ministrisë se Drejtësisë të gjithë dokumentacionin e nevojshëm për procedurën e ekstradimit.
Por, deri në ketë moment SPAK nuk është njoftuar nga autoritetet austriake te drejtësisë për ecurinë e mëtejshme te procedurës se ekstradimit.
SPAK e akuzon Gugallen se në bashkëpunim me Klodian Zoton dhe Mirel Mërtirin kanë korruptuar zyrtarë për fitimin e koncensioneve të inceneratorëve dhe ndaj tyre është ngritur akuza e korrupsionit aktiv. Zoto e Mertiri janë ende në kërkim.
Kujtojmë se në lidhje me aferën e inceneratorëve janë arrestuar ish-zyrtarë si ish-ministri Lefter Koka dhe ish-deputeti i PS Alqi Bllako.
