Policia Lezhë në bashkëpunim me Interpol Tirana kanë arrestuar një peson të shpallur në kërkim ndërkombëtar. Bëhet fjalë për 48-vjeçarin Astrit (Nimani) Limani i cili ishte dënuar nga Gjykata e Milanos me 13 vite burg për “Organizatë kriminale me qëllim trafik të lëdëve narkotike”.
Limani, i njohur ndryshe në Lezhë si “Titi Ukës” nuk është nje emër i panjohur per policinë. Në 15 nëntor 2013 ai u arrestua në Serbi dhe më pas u ekstradua në Itali, ku ishte dënuar për trafikim lëndësh narkotike.
Ai ishte liruar në Itali dhe cështja ka kaluar në Apel. Këtë periudhë Limani e ka shfrytëzuar për tu kthyer në Shqipëri dhe po në vitin 2013 ai rezulton anëtar i Këshillit Bashkiak në Bashkinë e Lezhës nën siglën e Partisë Ora e Shqipërisë.
Në vitin 2015, Gjykata Lezhë do të vendoste sekuestrimin e një pasurie prej 10 milion eurosh të Limanit, ku përfshiheshin tre pallate me 230 apartamente banimi dhe një hotel.
Policia e Lezhës tha atëherë se sekuestrimi ishte në kuadër të Procedimit Penal nr. 615, në ngarkim të shtetasit Astrit Nimani, banues në Lezhë./Opinion.al
