Policia e Vlorës njoftoi arrestimin e një 36-vjeçari nga Fieri për llogari të autoriteteve italiane. Bëhet fjalë për Robert Kasemi. Gjykata e Breshias në Itali në vitin 2018, ka lëshuar urdhër arresti ndërkombëtar ndaj 36-vjeçarit për veprën penale “Pjesëmarrje në organizatë kriminale me qëllim trafikimin e lëndëve narkotike, kryer në bashkëpunim”.
Bëhet fjalë për një operacion të zhvilluar në nëntor të 2017, ku u godit një organizatën kriminalë në Breshia që trafikonte marijuanë nga Shqipëria dhe kokainë nga Holanda. Koka e këtij grupi ishte Neroid Shuhani, ndërsa krahu i djathtë i tij një grua italiane e quajtur Daniela Boniotti.
Pjesë e kësaj organizate të trafikut ndërkombëtar ishin edhe 11 shqiptarë të tjerë, ndër të cilët janë identifikuar Luan Shuhani vëllai i drejtuesit Neroid Shuhani, dhe Robert Kasemi i cili është nipi i tij. Këta kishin rol të rëndësishëm në këtë grup kriminal.
Hetimet për këtë organizatë kriminale nisën pas zhdukjes së italianit Roberto Bracchi në nëntor 2013, i cili zotëronte një lokal. Autoritetet zbuluan se partneri i tij në biznes ishte në fakt krahu i djathtë i një 37-vjeçari shqiptar të përfshirë në këtë trafik droge.
Gjatë operacionit anti-drogë të zhvilluar nga autoritetet italiane, u sekuestruan 2.7 ton marijuanë në një kamion në periferi të Romës dhe 3 kilogramë kokainë. Hetimet kanë zbuluar se marijuana trafikohej nga Shqipëria drejt Italisë, ndërsa kokaina nisej nga Holanda./ Opinion.al
