Në Hong Kong po zhvillohen zgjedhjet lokale ku deri më tani është shënuar një numër rekord personash që kanë marrë pjesë në votime.
Këto zgjedhje shihen si barometër për mbështetjen e protestave anti-qeveritare, që po mbahen në këtë qytet gjysmë-autonom gjatë muajve të fundit.
Votimet kanë nisur më 24 nëntor dhe qytetarët do të votojnë për të zgjedhur 452 përfaqësues të qytetit për 18 këshilla të qarqeve.
Të dhënat qeveritare tregojnë se mbi 1,5 milion persona kanë votuar deri në orën 13:30 sipas kohës lokale, teksa kanë mbetur edhe disa orë për mbylljen e procesit të votimit. Numri i pjesëmarrësve në zgjedhje është më i lartë, nëse krahasohet me zgjedhjet e katër viteve më parë, ku kishin votuar 1,4 milionë persona.
Udhëheqësit në Hong Kong dhe qeveria në Pekin u kanë bërë thirrje votuesve që të kundërshtojnë lëvizjen pro-demokracisë.
Kryeministrja e Hong Kong Carrie Lam, e cila është pro-Pekinit ka votuar më herët gjatë ditës. Ajo tha se organizimi i zgjedhjeve ka qenë jashtëzakonisht i vështirë për shkak të protestave, por shtoi se votimet do të jenë pjesërisht paqësore dhe të qeta falë punës së personelit të sigurisë.
Në Hong Kong për gjashtë muaj me radhë janë organizuar protesta anti-qeveritare, ku protestuesit po shprehin zemërimin e tyre, lidhur me atë që ata e vlerësojnë si përpjekje të Pekinit për të kufizuar autonominë e Hong Kongut./Opinion.al/
