Në çdo 1.5 kilometër rrugë të tre akseve kombëtare që lidhin Tiranën me Vlorën, Rinasin dhe Elbasanin, është vendosur një kamera dixhitale.
Këto kamera të fuqishme janë në funksion 24 orë dhe regjistrojnë çdo shkelje rrugore që kryhet nga përdoruesit e rrugës.
Shkeljet filmohen, regjistrohen dhe kalojnë për përpunim në qendrën kombëtare të kontrollit të trafikut.
“Ndodhemi në Qendrën Kombëtare të Monitorimit të Trafikut, e para e këtij lloji në Shqipëri, janë 200 km rrugë të cilat monitorohen në kohë reale me kamera dixhitale”, raportoi gazetarja Erikleda Dorezi.
“Ne kemi tre segmente që janë Tiranë-Elbasan, Vorë-aeroporti “Nënë Tereza”, dhe segmenti më i gjatë Tiranë-Vlorë i cili ka dhe trafikun më të lartë gjatë gjithë, vitit por sidomos gjatë sezonit turistik. Janë vendosur 150 kamera”, tha Marin Bezhani, drejtor i QKMT.
Kamerat janë në gjendje të identifikojnë jo vetëm tipin e automjetit, por edhe targën, drejtuesin si dhe shkeljen përkatëse të kryer prej tij.
“Kur ndodh një shkelje supozohet tejkalim shpejtësie, kapet nga kamerat, analizohet nga operatorë të sallës QKMT dhe dërgohet tek Policia Rrugore. Kjo e fundit verifikon rastin dhe merr masën për gjobën përkatëse. Mund të kemi evidentuar diku 25-30 % e rasteve ditore”,tha Bezhani.
“Në ledwall-in e parë siç duket edhe nga pamjet kemi të gjitha akset që janë nën monitorim. Çdo 1.5 km kemi 1 kamerë digjitale e cila sjell në kohë reale pamjet nga akset rrugore”, raportoi gazetarja.
“Në ledwallin e dytë janë të gjitha statistikat për automjete në qarkullim si dhe shkeljet rrugore, në 24 orët e fundit piku i shkeljeve është në orën 18:00-19:00”, shtoi gazetarja.
Brenda vitit nën monitorim me kamera do të përfshihen edhe 5 akse të tjera.
“Synojmë që në fazën përfundimtare të monitorohen deri në 3650 km rrugë”, tha drejtori i QKMT.
Monitorimi kryhet 24 orë në 7 ditë të javës dhe do te shërbejë edhe si një udhërrëfyes për projektet e ardhshme në infrastrukturën rrugore, pikat ku duhet ndërhyrë për të përmirësuar parametrat e sigurisë.
Tv Klan
