Komisioneri Shtetëror i Zgjedhjeve, Ilirjan Celibashi në një konferencë për mediat tregoi problematikat e para, që janë hasur në terren mbi procesin zgjedhor.
Celibashi u shpreh se nga përpunimi i informacioneve rezulton se janë 8% e qendrave të votimit që janë hapur me vonesë. Ndër të tjera kryekomisioneri raporton se janë 5% e qendrave të votimit ku është raportuar se ka pasur tension mes anëtarëve të komisionit, ku situata është stabilizuar me ndërhyrjen e KQZ.
Ilirjan Celibashi e ka quajtur të qetë dhe normal procesin deri në këto momente pavarësisht problematikave në orët e para të mëngjesit.
Sa i takon votimit elektronik, Celibashi thekson se po vijon normalisht dhe pa problematika.
“Nuk kemi asnjë qendër votimi të pahapur. Nga përpunimi i informacionit në orët e para të mëngjesit janë 8% e qendrave të votimit janë hapur me vonesë. Vlen të theksohet se në momentet kur procesi i votimit është hapur kanë qenë prezenteë vëzhgues, ose të partive ose të tjerë. 5% të qendrave të votimit raportohet se ka pasur tensione. Ka ndërhyrë Komisioni Qendror i Zgjedhjeve dhe situata është normalizuar. Kemi një raportim lidhur me personat me aftësi të kufizuar 21% e rasteve që ne kemi kërkuar informacion, ata nuk janë asistuar, jo në të gjitha rastet është respektuar.
Kemi një raportim që në 5% të qendrave të votimit kemi mosrespektim të distancës prej 150 metrash të individëve që më së shumti kanë përfunduar procesin e votimit dhe vazhdojnë të qëndrojnë rreth qendrave të votimit. Identifikimi elektronik na rezulton se janë 4 qendra votimi që nuk janë paraqitur operatorët, kryesisht në Dropull. Janë 4 qendra votimi ku identifikimi i zgjedhësve po bëhet manualisht.
Rezulton se tej atyre problematikave të orës së parë, procesi mund të vlerësohet se ka filluar dhe po vijon normalisht. Ka një rast ku raportohet për presion të zgjedhësve. Patëm raportim nga stafi jonë në terren, por edhe nga përfaqësues të partive për prezencë të kandidatëve për deputetë në qendrat e votimit. Kandidatët për deputet nuk mund të jenë vëzhgues në qendrat e votimit, prandaj ne dolëm me një thirrje, pasi mund të ketë prej tyre që nuk ishin në dijeni të kësaj rregulloreje. Prej atij momenti nuk kemi raportime në lidhje me këtë çështje.
Sa i takon procesit të votimit elektronik, sipas raportimeve tregohet se procesi aty po shkon normalisht. Nuk janë raportuar probleme si për pajisjen apo probleme të tjera. Pjesëmarrja është 13.54% por këtë mund ta konsultoni në kohë reale. Flitet për 4 ose 5 raste të kandidatëve për deputet, pak rëndësi ka se kë përfaqësojnë. Situata është zgjidhur dhe nuk mendoj se ka vend për ta riadresuar. Thirrja publike që kemi bërë ka rezonuar mirë”u shpreh Celibashi.
