Ministria e Bujqësisë dhe Zhvillimit Rural ka nxjerrë udhëzim të ri lidhur me licencat e prodhimit dhe transportimit të kanabisit mjekësor në vend. Sipas aktit të ri, për çdo fazë të punës nga importi i farës, kultivimi, përpunimi, magazinimi dhe transporti e eksporti kërkohet një leje e veçantë si edhe një marrëveshje midis subjekteve.
“Kriteret për të marrë lejen përfshijnë regjistrimin në QKB, pasjen e një plani biznesi 5-vjeçar, dokumentimin e marrëdhënies me tokën, rregullore të brendshme administrative, plan trajnimi për punonjësit dhe performancë pozitive financiare. Subjektet duhet të mos kenë detyrime të prapambetura ndaj tatimeve, energjisë dhe ujit dhe të kenë staf të përputhur me ligjin në fuqi për pastërtinë e figurës dhe etikën profesionale.”
Udhëzimi kërkon që subjektet të kenë edhe dokumentacion teknik për ambientet, planimetrinë dhe pajisjet e nevojshme për magazinim e përpunim, ndërsa thekson se leja për këtë aktivitet nuk mund të jepet nëse nuk ka një marrëveshje për shitjen e produktit final.
“Subjektet që merren me import të farës, fidanit apo klonit duhet të kenë një marrëveshje paraprake shitjeje me subjektin kultivues. Subjektet që ushtrojnë kultivim duhet të kenë një plan zhvillimi dhe prodhimi të miratuar paraprakisht. Në çdo rast, leja nuk jepet nëse mungon marrëveshja për shitjen e lëndës së parë ose të produktit final me një subjekt pritës të licencuar për përpunim ose eksport.”
Dokumenti i ri shfuqizon udhëzimin e mëparshëm të vitit 2024 dhe hyn në fuqi menjëherë pas botimit në Fletoren Zyrtare.
