TIRANË- Nis nga dita e hënë (14 shtator) nuk do të lejohen më të qarkullojnë gjatë paradites në unazën e vogël të qytetit të Tiranës furgonët e distributorëve të marketeve. Masat për trafikun nuk i ka prezantuar Policia Rrugore, por Kryetari i Bashkisë së Tiranës, Erjon Veliaj. “E gjitha kjo”, tha Veliaj, “bëhet për të shmangur trafikun gjatë kohës kur nxënësit shkojnë dhe kthehen nga shkolla”.
Rregullat e reja:
Ora 06.00 – 09.00 dhe 16.00 – 20.00 ndalohet qarkullimi i të gjitha mjeteve të transportit të mallrave në qytet.
Ora 6.00 – 20.00 ndalohet qarkullimi i mjeteve me ngarkesë të përgjithshme mbi 3.5 ton (në Unazën e mesme të qytetit, në brendësi të saj, si dhe në rrugët Sulejman Delvina, Abdyl Frashëri, Ismail Qemali, Elbasanit dhe Blv Bajram Curri).
Ora 06.00 – 20.00 ndalohet qarkullimi i mjeteve me ngarkesë të përgjithshme mbi 18 ton (në brendësi të unazës së madhe të qytetit, si dhe në akset kryesore hyrëse në të)
Ora 6.00 – 20.00 ndalohet qarkullimi i mjeteve me ngarkesë të përgjithshme deri në 25 ton (në akset kryesore hyrëse në qytet)
Sipas Bashkise, subjektet tregtare mund të kryejnë veprimtarinë e tyre furnizuese nga ora 20.00 e mbrëmjes deri në orën 06.00 të mëngjesit.
