Pas përfundimit të tryezës për reformën zgjedhore, e mbyllur në padakordësi për disa çështje, duket se i pandryshuar do të mbetet edhe sistemi zgjedhor.
Përfaqësuesi i mazhorancës Damian Gjiknuri tha se çështja e sistemit do të diskutohet në një fazë të dytë. Ndërkohë, në daljen e saj për mediat, pas 4 orësh diskutime deputetja Rudina Hajdari tha se as Partia Demokratike nuk e ka mbështetur idenë e listave të hapura.
“Propozova të rrinim sot deri vonë, u çuan pasi nuk morën përgjigjet që donin. Erdha në këtë tryezë më qëllim ndryshimin e sistemit. Nuk kuptoj pse PD nuk e përqafon këtë ide. Erdha këtu edhe me dëshirën për të gjetur një formulë kompromisi që ta pranonin të gjitha palët dhe sot propozova një formulë të mbështetur nga ndërkombëtarët dhe Ambasada Amerikëne që e hap listën pjesërisht. Edhe këtë ma hodhën poshtë”, tha Hajdari duke iu referuar sistemit danez të përfolur së fundi.
Deputetja Hajdari si përfaqësuese në tryezën e reformës, tha se opozita dhe mazhoranca qëndruan së bashku në kundërshtimin e sistemit të propozuar prej saj.
“Përse këta njerëz kanë kaq frikë për të ndryshuar sistemin, për të hapur listat, për t’u dhënë shqiptarëve të votojnë përfaqësuesit e tyre? E kuptoj Edi Ramën që me këtë sistem është bërë autoritar dhe i pasur, por nuk e kuptoj Bashën përse e do këtë sistem që ka bërë Ramën perandor? Përse Basha do ta mbajë Ramën perandor? Përse sot këta qëndruan bashkë kundër këtij propozimi, i denjë, i realizueshëm në një kohë të shkurtër dhe nuk e bënë? Thanë gjëra të ndryshme. Nuk e pranuan sepse kanë frikë nga vota e qytetarit. Unë nuk dorëzohem sepse nga një anë kemi klasën e vjetër dhe në anën tjetër shqiptarët që duan ndryshimin e sistemit. Këta nuk e duan dhe duan të mbajnë këtë sistem, sepse i konvenjon Ramës dhe Bashës”, u shpreh deputetja Rudina Hajdari./Opinion.al
