Janë betuar ditën e sotme te Presidenti i Republikës 5 nga 7 ministrat e rinj të qeverisë Rama.
Këtë të martë mori detyrën si ministër i Jashtëm, Igli Hasani; si ministre Arsimi, Ogerta Manastirliu; si ministre Shëndetësie, Albana Koçiu; si ministre Bujqësie, Anila Denaj dhe si ministër për Pushtetin Vendor, Arbjan Mazniku.
Kujtojmë që Ervin Mete do të betohet në Presidencë si ministër i Financave dhe Ekonomisë pasi dekreti për të, të miratohet në Kuvend. Mete ka qenë drejtor ekzekutiv i AMF-së. Për këtë arsye, ditën e djeshme në seancë plenare u votua shkarkimi i tij nga ky post.
Tashmë kjo i jep Kuvendit mundësinë që ta votojë për postin e ministrit. Pas kësaj, Mete mund të paraqitet para Presidentit për t’u betuar e më pas për të marrë detyrën.
Në Asamblenë e PS-së më 4 Shtator kryeministri Edi Rama bëri disa ndryshime në qeverinë e tij. Ministrat që Rama largoi janë: Olta Xhaçka, Evis Kushi, Frida Krifca, Edona Bilali dhe Milva Ekonomi.
