Zëdhënësi i presidencës, Tedi Blushi, ka reaguar në lidhje me miratimin e ndryshimeve të Kodit Zgjedhor.
Në një status në Facebook, ai e quan votimin e sotëm të turpshëm nga ana e Kuvendit dhe paralajmëron se nesër do të publikojë emrat e atyre që votuan pro “për izolimin e Shqipërisë deri në 25 Prill”
“Zero surprizë nga Kuvendi i Turpit dhe Kokoshkave, që ulin kokën dhe ngrenë dorën. Ka vetem një fajtor dhe ky është Mister 1 Prilli ose Profeti i Kokoshkave. Të tjerët janë bashkëpunëtorët e tij të rëndomtë, të blerë, të kapur, të shantazhuar e të nënshtruar. Nesër publikojmë emrat e të gjithë atyre që ngritën dorën për izolimin e Shqipërisë deri në 25 Prill.”, shkruan Tedi Blushi.
Më tej ai flet për një komplot të mirëorganizuar prej 20 vitesh që synon defaktorizimin e shqiptarëve si popull dhe komb evropian. Pas zgjedhjeve të 25 prillit, zëdhënësi i presidencës shkruan se do të vijë një epokë e re, ajo që ai e quan “sundim përmes referendumeve”
“Presidenti është i qartë për shpartallimin e plotë të këtij komploti të mirëorganizuar prej 20 vitesh kundër popullit dhe kombit tonë, për defaktorizimin e shqiptarëve si një popull dhe komb europian. Tre milionë shqiptarë do të dinë si t’i përgjigjen këtij provokimi të poshtër, në mënyrë të bashkuar, europiane dhe Shqiptare. Askujt të mos i vijë keq për popullin shqiptar. Nuk jemi bërë për mëshirën e askujt. Do t’i dalim zot vetë vendit tonë dhe do tregojmë se e meritojmë Demokracinë dhe Lirinë. Nga 25 Prilli fillon një EPOKË E RE në Shqipëri. Ajo e sundimit të popullit përmes referendumeve. Vetëm kjo do garantojë sundimin e ligjit dhe fundin e kësaj oligarkie antishqiptare. Numërimi mbrapsht sapo filloi. JETËN E JAPIM, POR DEMOKRACINË DHE LIRINË KURRË MË”. /Opinion.al
