Presidenti Ilir Meta i është drejtuar me një letër Kryeparlamentarit Gramoz Ruçi dhe kryeministrit Edi Rama, lidhur me ndryshimet në Kodin Penal që pritet të miratohen sot në seancë plenare.
Në mënyrë të veçantë Meta kërkon që dispozitat e reja të jenë sa më të qarta për të garantuar parimin e sigurisë juridike. Ai thekson se në dispozitat e reja duhet të specifikohen qartë subjektet e tyre si dhe të bëhet dallimi mes dashjes dhe pakujdesisë.
“Dispozitat e reja duhet të jenë të qarta, për të mos cenuar parimin e sigurisë juridike, me qëllim që e gjithë popullata të mos mendojë se mund të bëhet subjekt i procedimit penal në mënyrë të padrejtë, ashtu siç është krijuar tashmë ky shqetësim në mbarë opinionin publik, referuar ky shqetësim edhe nga aktorët që u është marrë mendimi gjatë procesit legjislativ, por dhe duke parë mungesën e qartësisë së propozimeve.
Paragrafët e dispozitave të reja, duhet të përcaktojnë qartë elementët e secilës figurë të veprës penale, veçanërisht subjektin, si dhe format e konsumimit tësaj, duke bërë dallim të qartë mes dashjes dhe pakujdesisë, si dhe duke treguar kujdes në proporcionalitetin e dënimit në përputhje me pasojat qëmund të vijnë.
Gjithashtu, duhet qartësuar se një subjekt nuk mund të procedohet penalisht, nëse nuk është proceduar më parë në rrugë administrative.
Këto sugjerime paraprake vlerësoj se duhet të konsiderohen nga Kuvendi i Shqipërisë përpara votimit të kësaj nisme të rëndësishme ligjore.”, shkruan Meta. /Opinion.al