Janë larguar nga detyra sot drejtueset e doganave dhe tatimeve. Belinda Ikonomi drejtonte doganat prej vitit 2016, ndërsa vendin e saj do ta marrë Arlind Gjokutaj, i cili deri tani ka mbajtur detyrën e Drejtorit të Parandalimit të Pastrimit të Parave. Belinda Ikonomi do të marrë postin e zëvendësministres së Financave dhe të Ekonomisë.
Gjithashtu është shkarkuar drejtoresha e Tatimeve Vasilika Vjero. Pozicionin e saj e merr Enton Duro, i cili më herët ka qenë drejtor në Ministrinë e Financave.
Edhe Vasilika Vjero drejtonte këtë institucion prej vitit 2016. Vjero është e specializuar në administrim biznesi dhe në administrim publik, ndërsa përgjatë viteve ka mbajtur disa poste në administratën shtetërore, në Ministrinë e Kulturës dhe në Bashkinë e Tiranës, kur këto dy institucione drejtoheshin nga Edi Rama.
Ndërkohë, sipas CV-së së tij, drejtori i ri i doganave Arlind Gjokuta ka lindur në Gjirokastër në vitin 1981 dhe ka kryer studimet për administrim biznesi në Universitetin Bocconi në Milano, si dhe ka përfunduar studimet master për Financë dhe Menaxhim Risku. Gjokuta ka përvojë në çështjet fiskale, operacionet monetare, analizat ekonomike dhe në menaxhimin e riskut. Ai ka ushtruar disa detyra në administratë, si Koordinator i Posaçëm për ekonominë pranë Këshillit të Ministrave dhe ekspert i çështjeve fiskale dhe monetare në Bankën e Shqipërisë./Opinion.al
