Të tjera ndryshime janë bërë në policinë e Shkodrës pas vrasjes së dy vëllezërve Astrit dhe Brahim Bilali mëngjesin e së shtunës. Po atë ditë ministri i Brendshëm Sandër Lleshaj, shkarkoi nga detyra drejtorin e Policisë, Vehbi Bushati, i cili u zëvendësua me Niko Brahimajn.
Ndërkohë, pas Drejtorit të Policisë është mësuar se është larguar edhe shefi i komisariatit, Vasil Çela dhe në vend të tij është emëruar Lorenc Meta.
Të dielën u përcollën për në banesën e fundit, dy vëllezërit Bilali. Pranë trupit të viktimës Astrit Bilali u gjet një pistoletë, me të cilën dyshohet se i ndjeri u kundërpërgjigj me zjarr ndaj atentatorëve.
Sipas policisë, makina tip Benz që përdorën ekzekutorët ishte shpallur e vjedhur që nga viti 2018 dhe ishte me targa false. Në automjetin e djegur u gjet edhe arma automatike me të cilën u krye vrasja.
Policia tha se, deri më tani ka shoqëruar më shumë se 20 persona, të cilët janë marrë në pyetje për zbardhjen e ngjarjes, por ende nuk ka asnjë autor.
Në anën tjetër, qytetarët e Shkodrës po kalojnë ditë jo të qeta, pas 3 vrasjeve të fundit mafioze në qytet. Për ngjarjen e së shtunës, banorët shprehen se rendi dhe siguria në qytet mungon prej kohësh./ Opiniona. al E.Xh.
