Kreu i LIBRA-s, Ben Blushi, sot, në një takim me gazetarët ka pranuar një meritë të “Çadrës së Lirisë”, në protestë që prej 18 shkurtit, të cilën deri më tani vetëm e ka kritikuar.
Mirëpo, në transmetimin e drejtpërdrejt nga Facebook-u personal, përveç kritikave është shprehur se çadra e opozitës ka meritë thyerjen e traditës së aleancave të partive politike.
Kjo përgjigje erdhi, pas pyetjes së gazetarëve nëse LIBRA do të bënte koalicion me ndonjë nga partitë politike.
“Ne e kemi ditur që në fillim që nuk do të hymë në koalicion. Sepse me kë të bëhemi në koalicion, me PD-në apo me PS-në që mbrojnë parime të ndryshme nga ne. Koalicionet janë e keqja na kanë sjellë në këtë pikë.
Një nga rezultatet më të mira, pozitive që Çadra e PD-së na solli dhe do ta them sot, është që theu traditën e aleancave, duhet t’ja njohim këtë meritë, në kuptimin juridik të zgjedhjeve. Besoj se kurdoqoftë që sistemi të ndryshojë, do shkojmë drejt një sistemi që sulmon aleancat.”, tha Blushi.
