Sot në mëngjes, sipas matjeve zyrtare të bëra nga Agjencia Amerikane e Mbrojtjes së Ambientit, ndotja në Prishtinë ishte në nivelin 159 AQI (njësia matëse e cilësisë së ajrit). Sipas agjencisë amerikane, ky nivel i lart i ndotjes mund të shkaktojë probleme shëndetësore për të gjithë, ndërkaq kategoritë e ndjeshme mund të përjetojnë komplikime serioze. Për më keq gjatë natës, gjegjësisht në ora 3 të mëngjesit të sotëm, niveli i ndotjes në Prishtinë ishte 231 AQI, që konsiderohet nivel i rrezikshëm i ndotjes me mundësi pasojash serioze për të gjithë.
Opinion.al mëson se ky nivel i lart i ndotjes është pasojë e ndotjes industriale nga termoelektranat, ndotjes nga makinat, por edhe kushteve të rënda klimatike që aktualisht kanë mbuluar rajonin.
Një ditë më parë, për shkak të nivelit të lart të ndotjes së ajrit, autoritetet në Shkup të Maqedonisë kanë paralajmëruar qytetarët të mos dalin jashtë pa nevojë, ndërkaq autoritetet në Prishtinë nuk janë marrë fare me këtë çështje kaq serioze, që kohëve të fundit përbën një problem shumë serioz për kryeqytetin kosovar.
Duhet theksuar se këto ditë ndotja e ajrit në Prishtinë është e përafërt me nivelin e ndotjes në Nju Delhi të Indisë, që konsiderohet një nga qytetet me cilësi më të dobët të ajrit në botë.
/Opinion.al – 23 Nëntor
