Ujërat në akuariumin e portit të Durrësit janë ndotur pas çarjes së tubit të presionit të vajit në një anijen tregtare.
Për këtë rast uniformat blu njoftojnë se kanë nisur procedimet në gjendje të lirë, për veprën penale “Ndotja e ajrit, e ujërave dhe e tokës”, për kapitenin e anijes P. L., 48 vjeç, banues në Rusi, kryemekanikun A. S., 35 vjeç, banues në Rumani dhe mekanikun e dytë V. F., 63 vjeç, banues në Rusi.
Mësohet se anija pësoi defekt dhe sipërfaqja ujore e ndotur u pastrua nga shërbimet e agjencisë përgjegjëse.
“Port, Durrës/ U ndotën ujërat në akuariumin e portit, për shkak të një defekti në anijen që kanë në përgjegjësi, procedohen penalisht 3 shtetas të huaj, përkatësisht kapiteni, kryemekaniku dhe mekaniku i dytë.
Sipërfaqja ujore e ndotur u pastrua nga shërbimet e agjencisë përgjegjëse.
Menjëherë pas njoftimit për ndotje të ujërave në kalatën nr.7 të portit të Durrësit, specialistët e Policisë Kufitare, në bashkëpunim me ata të Kapitenerisë së Portit, IKMT-së dhe të mjedisit, kryen verifikimet për të nxjerrë përpara përgjegjësisë penale, shtetasit përgjegjës.
Për rastin u referuan materialet në Prokurori, ku nisën procedimet në gjendje të lirë, për veprën penale “Ndotja e ajrit, e ujërave dhe e tokës”, për shtetasit P. L., 48 vjeç, banues në Rusi, A. S., 35 vjeç, banues në Rumani dhe V. F., 63 vjeç, banues në Rusi.
Procedimi penal për këta shtetas nisi sepse nga verifikimet rezultoi se ndotja e ujërave ishte shkaktuar nga çarja e tubit të presionit të vajit, të anijes tregtare, në të cilën shtetasi P. L. është kapiten, shtetasi A. S. është kryemekanik, ndërsa shtetasi V. F. është mekanik i dytë”, njofton policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme./Opinion.al
