Për herë të parë në Mbretërinë e Bashkuar ka lindur një foshnjë duke përdorur ADN-në e tre personave. Lajmi është konfirmuar nga rregullatori i fertilitetit, raporton BBC.
Kjo do të thotë se kjo bebe ka material gjenetik nga nëna, babai dhe një dhuruese grua, donatore.
Teknika është një përpjekje për të parandaluar që fëmijët të lindin me sëmundje shkatërruese mitokondriale.
Procedura parashikon ndërhyrjen në procesin e fertilizimit për të parandaluar që gjenet me defekt të kalojnë në mitokondri.
Sëmundjet mitokondriale janë të pashërueshme dhe mund të jenë fatale brenda ditëve apo edhe orëve pas lindjes. Disa familje kanë humbur shumë fëmijë dhe kjo teknikë shihet si e vetmja mundësi që ato të kenë një fëmijë të shëndoshë të tyren.
Mitokondritë janë ndarjet e vogla brenda pothuajse çdo qelize të trupit që konvertojnë ushqimin në energji të përdorshme.
Mitokondritë e dëmtuara nuk ushqejnë trupin dhe çojnë në dëmtim të trurit, humbje të muskujve, dështim të zemrës dhe verbëri.
Sidoqoftë, BBC shkruan se mitokondritë kanë informacionin e tyre gjenetik ose ADN-në që do të thotë se teknikisht fëmijët që ngjizën në këtë formë rezultojnë se trashëgojnë ADN-në nga prindërit e tyre dhe një grimcë nga dhuruesi gjithashtu. Ky është një ndryshim i përhershëm që do të përcillet brez pas brezi.
Kjo ADN dhuruese është e rëndësishme vetëm për krijimin e mitokondrive efektive, nuk ndikon në tipare të tjera si pamja e jashtme dhe nuk përbën një “prind të tretë”.
Teknika u prezantua në Newcastle dhe ligjet u prezantuan për të lejuar krijimin e foshnjave të tilla në Mbretërinë e Bashkuar në 2015./Opinion.al
