“President, unë nuk dua të shkoj tek Anderelcht”. “Ah, kështu është puna? Atëherë zbrit menjëherë nga autobusi dhe fillo të ecësh”. Ky duhet të ketë qenë, pak a shumë, sipas “L’Equipe”, dialogu i zhvilluar rreth dhjetë ditë më parë mes Lucas Silva dhe Vincent Labrune, presidenti i Marseille.
Mesfushori 22-vjeçar, i transferuar nga Real Madrid te Olympique verën e kaluar me formulën e huazimit, duket se është zbritur nga autobusi i ekipit, mes befasisë së shokëve të skuadrës, që po shkonin drejt Montpellier për ndeshjen e Ligue 1 të 2 shkurtit. Arsyeja: refuzimi për t’u huazuar në ditën e fundit të merkatos.
Braziliani nuk po shkëlqen në këtë sezon: 788 minuta aktivizim në kampionat dhe disa paraqitje në kupa, por pa gola dhe asiste. Kur Marseille i ka ofruar të transferohet në Belgjikë deri në qershor, lojtari duhet të ketë menduar se shanset për një kthim te Reali do të pakësoheshin ndjeshëm pas një lëvizje të tillë.
Për këtë arsye ka ardhur refuzimi, me presidentin që është kundërpërgjigjur duke thënë: “vazhdo rrugën në këmbë”. Jashtë listës së Europa League, ka shumë mundësi që Silva të kthehet në Brazil në javët e ardhshme. Dhe këtë herë bën mirë të pranojë, sepse të zbresësh nga një avion në fluturim nuk është njësoj si të zbresësh nga një autobus në mes të rrugës…
