Ndonëse në një periudhë pandemie, ndërtimi dhe aktivitetet e pasurive të paluajtshme ishin dy nga sektorët që patën ndikim të madh në rritjen e Prodhimit të Brendshëm Bruto, përgjatë 3 mujorit të tretë të vitit 2021.
Pjesa dërmuese e këtij aktiviteti është e përqendruar pikërisht në kryeqytet, ku tashmë ka hyrë në fuqi një urdhër për ndalimin e lëvizjes së automjeteve të këtij sektori gjatë ditës, çka do të thotë praktikisht edhe pezullim i punimeve, pasi sipas shoqatës së ndërtuesve, puna natën është e pamundur dhe mbi të gjitha e rrezikshme.
Sipas të dhënave të bëra publike nga INSTAT, ndërtimi ka ndikuar në rritjen prej 6,99 % të Prodhimit të Brendshëm Bruto me 0.39% dhe aktivitetet e pasurive të paluajtshme me 0.41%, duke u renditur pas grupsektorit të: “Tregtisë, Transportit, Akomodimit dhe shërbimi ushqimor” si dhe atij të “Industrisë nxjerrëse, përpunuese; Energjisë elektrike dhe ujit”.
Krahasuar kjo me të njëjtën periudhë të vitit 2020, sektori i ndërtimit shënoi një rritje me 3.95%. Ky sektor ka gjithashtu një peshë të lartë në ekonominë shqiptare në krahasim edhe me mesataren e Rajonit dhe BE. EUROSTAT, institucioni i statistikave të Bashkimit Europian, bën të ditur se ndërtimi zuri 9,9 % të Vlerës së Shtuar së ekonomisë së Shqipërisë më 2019.
Ndërtimi në Shqipëri arriti pikën më të ulët në vitin 2014, për t’u rimëkëmbur lehtë gjatë viteve në vijim, ku ka qëndruar rreth nivelit prej 10% të Vlerës së Shtuar të Ekonomisë.
Ndërtimi gjithashtu është një nga sektorët që gjeneron afro 7% të të gjitha vendeve të punës në vendin tonë. Sipas të dhënave zyrtare të INSTAT në vitin 2019 në këtë sektor ishin rreth 80 mijë të punësuar.
Gjithashtu ky sektor zë vendin e parë edhe në strukturën e investimeve në vendin tonë. Sipas të dhënave të të INSTAT gjatë vitit 2018, për çdo 100 Lekë që investoheshin në ekonominë shqiptare, 75 Lekë shkuan në ndërtim./ Tv Klan
