Presidenti Donald Trump ka vlerësuar qenin e ushtrisë amerikane të përfshirë në operacionin që çoi në ekzekutimin e udhëheqësit të Shtetit Islamik Abu Bakr al-Baghdadi në Siri. Presidenti Trump postoi në rrjetin “Twitter” fotografinë e qenit luftëtar duke shkruar se ka kryer një punë të mrekullueshme.
“Kemi deklasifikuar foton e qenit të mrekullueshëm (emri mbahet sekret) që bëri një punë të mrekullueshme në gjetjen dhe vrasjen e udhëheqësit të ISIS, Abu Bakr al-Baghdadi”-shkroi presidenti i SHBA, Donald Trump.
Ndërsa shefi i Shtatëmadhorisë amerikane, Gjenerali Mark Milley, tha se qeni kishte pësuar lëndime të lehta gjatë operacionit dhe se pritet të shërohet plotësisht dhe të kthehet në sherbim.
“Nuk do ta bëjmë të ditur emrin e qenit tani. Qeni është ende në shërbim. Qeni i ushtrisë kreu një shërbim të jashtëzakonshëm, siç veprojnë të gjithë , në situata të ndryshme”- theksoi Shefi i Shtatëmadhorisë amerikane, Gjenerali Mark Millley./Opinion.al
