Partia Demokratike ka reaguar pas marrëveshjes së arritur mes naftëtarëve dhe qeverisë.
Teksa publikon një video ku kryeministri Edi Rama premton kujdes shëndetësor, aparatura dhe rimbursim medikamentesh, ish-deputeti Enkelejd Alibeaj thotë se asgjë nuk ka ndodhur, pasi sipas tij naftëtarët do të vuajnë dhe nafta do të vidhet.
Aliebaj thotë se ajo që i ka premtuar Rama naftëtarëve është një mashtrim, ndërsa thekson se historia e mashtrimeve dhe vjedhjeve të pasurisë kombëtare përsëritet.
“Historia e mashtrimeve dhe e vjedhjeve të pasurisë kombëtare përsëritet çdo herë me Edi Ramën. Edi Rama di vetëm të gënjejë. Një gënjeshtër sot, një gënjeshtër mot, ka kaq vite që u bën naftëtarëve premtime boshe. “U mbars mali e polli një mi” – është thënia që i rri më mirë Edi Ramës, sepse edhe kësaj here asgjë nuk ka për të ndodhur. Naftëtarët do të vuajnë, nafta do të vidhet. Ndiqeni videon! Aty është fytyra e një kryeministri të pafytyrë që tallet me bukën e gojëa të qindra familjeve. Thotë të njëjtat gënjeshtra që të shtyjë edhe një ditë tjetër në karrige. Ajo është e vetmja gjë që i intereson. Njerëzit nuk i ka patur dhe nuk i ka në llogari”, shkruan Alibeaj.
Më herët naftëtarët pranuan propozimin e kryeministrit Edi Rama. Një ditë më parë, kryeministri tha se naftëtarët do të marrin një pagë të ndërmjetme për një periudhë të caktuar kohore dhe se uzina do të vihet në punë nga një kompani serioze./Opinion.al
