Ka nisur hetimi për një 78-vjeçari i cili ndezi zjarr në tokën e tij dhe si pasojë e përhapjes së flakëve u dogj një sipërfaqe toke me pemë frutore dhe ullinj.
I moshuari u procedua në gjendje të lirë, për shkak të moshës së tij.
“Specialistët për Hetimin e Krimeve të Komisariatit të Policisë Elbasan, si rezultat i hetimeve të kryera për rastet e zjarrvënieve, identifikuan autorin e dyshuar të një rasti, shtetasin M. K., 78 vjeç, banues në fshatin Valas, për të cilin u referuan materialet në Prokurori dhe nisi procedimi në gjendje të lirë, për shkak të moshës.
Nga hetimet e kryera dyshohet se ky shtetas ka ndezur zjarr në tokën e tij, për të shkrirë dy tuba plastike që i përdorte për vaditje, dhe si pasojë e përhapjes së flakëve është djegur një sipërfaqe e madhe toke me pemë frutore dhe ullinj”, njofton policia.
Materialet procedurale i kaluan Prokurorisë pranë Gjykatës së Shkallës së Parë e Juridiksionit të Përgjithshëm Elbasan, për veprime të mëtejshme.
