Për miqësoren ndaj Armenisë, që do të luhet më 19 nëntor në stadiumin “Air Albania”, në orën 17:30, Kombëtares do t’i mungojnë 3 futbollistë kryesorë.
Sulmuesi Armando Broja, i cili doli nga loja i dëmtuar në ndeshjen me Italinë pas një problemi në kavilje, është kthyer në Londër.
Ndërsa Odise Roshi dhe Myrto Uzuni janë larguar nga grumbullimi, pasi janë të impenjuar këtë fundjavë në ndeshjet e kampionateve respektive ku aktivizohen.
Në këtë mënyrë, mund të ketë hapësirë për sulmuesin e Partizanit, Xhuliano Skuka, i cili ndaj Italisë u aktivizua në minutat e fundit duke iu afruar madje golit me akrobaci, si dhe për Ernest Muçin.
